Qırımnıñ Rusiye akimiyeti ve Müftiyatı sentâbr 25 künü Aqmescitte Cuma Caminiñ qurucılığı başlağanı aqqında bildire, onı üç yıl içinde qurmaq niyetindeler, haber ete Qırım.Aqiqat mühbiri.
Qırım yolbaşçılığı ve Müftiyat temsilcileri cuma künü Aqmescitte Yaltinskaya soqağı boyunca yerleşken topraq damartısına keldi. Toplanğanlarğa bildirilgeni kibi, qurulacaq camide birden 1,5 biñ erkek ve 900 qadın namaz qıla bilecek, musulman bayramlarında müminler sayısınıñ daa biñ insanğa artması mümkün. Olarnı cami azbarı sayesinde de sığdıra bilecekler.
Belli ki, cami 49 metr yüksekliginde dört minareden ibaret olacaq. Qubbe ölçüsi, leyha müellifleri aytqanı kibi, 18 metrni teşkil etecek, bina – 38/76 metr. Сami bir qaç seviyeden qurulacaq.
Qurucılıqqa ayırılğan topraq damartısında nice yıllar devamında toplanılğan qaburçaq taşı endi qalmadı. Şimdi mında «Erbek» şirketiniñ qurucılıq tehnikası tura.
«Bugün bizim içün müim bir kün edi. Bu künni biz çoq sene devamında beklegen edik», – dey Qırım müftisi Emirali Ablayev.
Qırımnıñ rusiyeli başı Sergey Aksenov «Cuma Cami Aqmescit ve Qırımnıñ ziyneti olacağını» qayd etti.
Qurucılıqqa ne qadar para masraf etilecegi aqqında Sergey Aksenov bir şey atmaydı, yalıñız leyhağa Rusiye prezidenti Vladimir Putin qol tutqanını qayd etti.
Qırım.Aqiqat mühbiri bildirgeni kibi, Aksenovnıñ kelmesinden evel ATR telekanalınıñ hadimlerini cami qurulacaq yerni terk etmege mecbur ettiler.
Sentâbr 17 künü, Aqmescitte Cuma caminiñ qurucılığına ayırılğan Yaltinskaya soqağı, 22 adresi boyunca topraq damartısında Qırımda esas musulman ibadethanesiniñ quruluvı içün territoriyanı azırlamağa başladılar.
2011 senesi Qırımda Vasiliy Cartı baş nazir olğan vaqıtta Aqmescitte Yaltinskaya soqağı, 22 adresi boyunca Cami-Caminiñ qurucılığına kapsula qoyğan ediler.
