Link açıqlığı

Cikayeva: Ukraina duşmanları Qırımnıñ qaytarıluvından soñ anda qalır, amma cenkleşmeycek


Yarımadanı terk etmege mecbur olğan Qırım rejissörı Galina Cikayeva dey ki, Qırımnıñ Ukraina uquqiy alanına qaytmasından soñ yarımadada Ukraina devletine qarşı çıqqanlarnıñ sayısı yeterli olur, amma aynı zamanda olar Qırımnı terk etmeycek.

Bu aqta o sentâbr 25 künü Qırım.Aqiqat Radiosınıñ saba efirinde bildirdi.

«Qırım Ukrainağa qaytqanda, duşmanlarımız çoq olur. Amma vaziyet kerginleşse, cenkleşecekler dep tüşünmeyim. Olar öz yemligini pek seve ve özlerini telükege qoymaycaqlar. Eger, aqiqaten, Qırım Ukrainağa qaytsa, ya dayanacaqlar, ya ketecekler», – dey rejissör.

O şunı da qayd etti ki, Qırım er vaqıt «kürekniñ (sovok) qoruğı» edi.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.

XS
SM
MD
LG