Link açıqlığı

Ukraina prezidentiniñ insan aqları boyunca vekâletlisi Valeriya Lutkovskaya Varşavada sentâbr 24 künü ОSCE toplaşuvında Qırım Rusiye nezareti altına keçkeninden soñ yarımadada «qorqu müiti üküm sürgenini» bildirdi.

«Yarımadada qorqu, fizikiy ve ruhiy basqı müiti qırımtatar halqınıñ temsilcilerini qolay olmağan qarar alıp, tuvğan yerlerini terk etmek ve qıtaiy Ukrainada yahşı ayat qıdırmağa mecbur ete», – bildire Lutkovskayanıñ sözlerini matbuat hızmeti.

O Qırımda faallerniñ ğayıp oluvı ve öldürüvleri aqqında hatırlattı. Ukraina ombudsmeni tüşüngeni kibi, bu vaqialar uquq qoruyıcı organlar tarafından zaruriy derecede taqiq etilmey.

Uquq qoruyıcılar daima Qırımda insan aqlarınıñ bozuluvı aqqında bildire, amma Rusiye akimiyeti yarımadada bu bozuluvlarnı red ete.

Ukraina Yuqarı Şurası 2014 senesi fevral 20 kününi Qırımnıñ muvaqqat işğaliniñ başlanuv tarihı olaraq ilân etti.

Ukraina içtimaiy siyaset nazirliginiñ malümatına köre, Donbass ve Qırımdan 483 biñ 119 köçip kelgen insan qayd etildi.

XS
SM
MD
LG