Link açıqlığı

Qırım rejissörı Galina Cikayeva sentâbr 20 kününden Herson vilâyetinde memuriy sıñırda keçken yarımadanıñ «vatandaşlıq» qamaçavına qol tuta. Amma, onıñ fikrine köre, işbu meselede siyasiy irade olmalı.

Bunı o sentâbr 25 künü Qırım.Aqiqat Radiosınıñ saba efirinde bildirdi.

«Qırımnıñ «vatandaşlıq» qamaçavına qol tutam, çünki Qırım meselesini al etmege kerek, acele ve er ceetten. Amma siyasiy irade olmalı. Vatandaşlıq aktsiyası, menimce, bunı devlet seviyesinde etmek kerek», – dedi rejissör.

«İşğal etilgen territoriya, malnı anda yollamağa mümkün degil. Menimce, bizni añlarlar», – dedi Cikayeva, yarımadada yaşağan qırımlılar aqqında aytqanda.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.

XS
SM
MD
LG