Link açıqlığı

Ukraina prezidenti «Qırım» serbest iqtisadiy zonası aqqında qanunnı lâğu etmege istey – Çubarov


Ukraina prezidenti ««Qırım» serbest iqtisadiy zonası aqqında» qanunınıñ lâğu etilmesi aqqında qanunnı qabul etmege emir berdi. Bunı 2+2 telekanalınıñ efirinde Ukraina Yuqarı Şurasınıñ deputatı, Qırımtatar Milliy Meclisiniñ reisi Refat Çubarov.

Bu aqta «Petro Poroşenko bloku» firqasınıñ matbuat hızmeti bildire.

«Prezident emir berdi, yaqın zamanda «Qırım» serbest iqtisadiy zonası aqqında» qanunınıñ lâğu etilmesi aqqında qanun qabul etilmeli. Böyleliknen, bu er şey uquqiy alanğa keçecek», – dedi Çubarov.

O dey ki, deputatlar Qırımnıñ energetik qamaçavı ile bağlı qanunlarnı da qabul etmeli.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.

XS
SM
MD
LG