Portugaliyada ukrain cemiyetiniñ temsilcileri sentâbr 20 künü qırımtatar halqınıñ yetekçileri tarafından başlanğan Qırımnıñ «vatandaşlıq» qamaçavına destegini bildirdiler.
Ukrain aktsiyası faalleriniñ talaplarına qol tutqanlar arasında – Portugaliyada ukrainlerniñ birligi, «Cerelo svitu» birligi, Algarvda ukrainlerniñ birligi, «Dıvosvit» ukrain medeniy-tasil merkezi, Faru şeerinde «T.Şevçenko adına mektep» ukrain-portugal tasil-medeniy merkezi.
Olar portugal akimiyetini Ukrainağa qol tutmağa çağıralar.
«Biz, Portugaliyada ukrain cemiyetiniñ temsilcileri, işbu teşebbüske qol tutamız ve ükümet ve portugal siyasetçilerini Ukrainağa Rusiye iyastilâsına qarşı küreşine, işğal etilgen territoriyalarnıñ azat etilmesine, Rusiyede siyasiy sebepler boyunca apiste bulunğan ukrain vatandaşlarınıñ serbest bıraqılmasına destek köstermege çağıramız», – denile Portugaliya ukrainleriniñ beyanatında.
Ukrainler Ukrain ve qırımtatar bayraqları ile Lissabon merkeziy meydanına kelip, video muracaatını yazğanlar.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.
