Link açıqlığı

Qırım qamaçavınıñ esas talapları – siyasiy, şunıñ içün aktsiya neticeleri aqqında aytmağa daa erte. Bunı Qırım.Aqiqat Radiosı efirinde siyasetşınas, Free Crimea leyhasınıñ ideologıTaras Berezovets bildirdi.

«Yekün çekmege daa erte, çünki qamaçavnıñ esas talapları – siyasiy. Siyasiy talaplar Rusiye akimiyeti tarafından yerine ketirilmez, bunı pek yahşı añlaymız», – dedi o.

Berezovets degeni kibi, aktsiya vazifelerinden biri – BMT Baş assambleyası arfesinde Qırım mevzusına diqqat celp etmek. Siyasetşınasnıñ sözlerine köre, New-Yorkta ukrain eyyeti bu mevzunı köterecek, Ukraina prezidenti Petro Poroşenko sentâbr 29 künü Baş assambleya toplaşuvında çıqışta bulunıp, «İşğal: Qırım adası. «Melez cenkniñ» hronikaları» kitabından malümatnı bildirecek.

Taras Berezovets sentâbr başında, «İşğal: Qırım adası. «Melez cenkniñ» hronikaları» kitabını taqdim etti. Onıñ sözlerine köre, işbu kitap halqara mahkemege dava azırlamaq içün delillerni bere bile.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.

XS
SM
MD
LG