Qurban bayramnı Qırımnıñ «erzaq» qamaçavı keçirilgen yerlerde de qayd eteler, haber ete Qırım.Aqiqat mühbiri.
«Qırım maydanında» – «Çonğar» kiriş noqtası rayonında keçirilgen aktsiya territoriyasında – 10 qoynı qurban çaldılar, pilâv pişire ve er kesni sıylaylar.
«Bir ailemiz. Öyledir. «Qırım maydanında» – qavmiy ukrain, qırımtatarlar, ermeni, gürciler… Amma epimiz – ukrainmiz. Umumiy bayramımız. Bayram sofrasına davet ettiler, ediyeler ile keldik», – dey Qırım.Aqiqatqa Geniçesk rayon devlet memuriyetiniñ başı Aleksandr Vorobyev.
Dinge köre, musulmanlarğa tek özlerine qurban etini aşamaq degil de, onı iane, ziyafet olaraq tarqatmağa kerek.
Böyleliknen, bir sofra başında memleketniñ farqlı regionlarından kelgen çeşit qavmiy gruppa ve din vekilleri toplandı.
Qamaçavnıñ teşebbüsçilerinden biri, ATR telekanalınıñ saibi Lenur İslâmov Qırım.Aqiqatqa aytqanı kibi, umumiy bayram qamaçav iştirakçilerine daa da yaqın tanışmaq, qonuşmaq içün imkân berdi.
O şunı da qayd etti ki, nevbetteki bayram künleri de «Qırım maydanı»nda ve «Kalançak», «Çaplinka» kiriş noqtaları rayonalırnda ziyafetlerni azırlaycaqlar.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.
