Lvivde Qırımdan köçip kelgenlerge Qurban bayram munasebeti ile bala ve qorantalar içün bayram merasimi keçirilecek.
Qırım.Aqiqatqa KrımSOS teşkilâtı bildirgeni kibi, cuma künü, sentâbr 25-de, Lvivde Detskaya Planeta merkezinde saat 16:00-21:00 bala ve ana-babaları içün bayram keçirilecek, cumaertesi künü Muhammad Asad adına İslâm medeniy merkezinde saat 15:00-17:00 balalar içün «tatlı» masa azırlanacaq.
«Rusiye Qırımnı işğal etken soñ Lvivge ve etrafına bir 2000 qırımtatarı köçti. Bunıñ ile Lvivde İslâm dinini kütken diger halqlar vekilleri yaşay. Şunıñ içün Qurban bayram Lvivde endi ekinci sene keçirile», – deyler teşkilâtta.
Ukraina prezidenti Petro Poroşenko ukrain musulmanlarını diniy bayramları – Qurban bayram ile hayırladı. Devlet başı bu bayramnı «meramet ve eyilik qıymetleri etrafında birleştirgen kün» olaraq adladı.
Qırımtatarlarnıñ yetekçileri – Mustafa Cemilev ve Refat Çubarov bu sene, bıltır olğanı kibi, yarımada işğalinden ve Rusiye akimiyetiniñ Qırımğa kirmek yasağından sebep, Qurban bayramnı Kiyevde qayd ettiler.
Qurban bayram – acılıqnıñ soñunda, Oraza bayramdan 70 künden soñ qayd etilgen musulman bayramıdır.
