Qırımtatar Milliy Meclisiniñ reisi Refat Çubarov Qırım ve Aqyar musulmanları diniy idaresiniñ müftisi ve imamlarını akimiyetke begenilmek içün areket etmemege çağırdı.
Bunı o Qırım.Aqiqatqa Kiyevde sentâbr 24 künü Qurban Bayram namazından soñ bildirdi.
«Allah sözüni añlatqan imamlarımız aqqında söz ketkende, olarğa talaplar, diger insanlarğa köre, daa da büyüktir. Mında, olar özüni nasıl alıp barmasalar da, musulmanlar arasında namus, insaf kibi çizgilerniñ körmemezlikke urulması mümkün olğanı aqta şübeni doğurmamaq kerektirler. İmamlarımız insanlarnı emin ve lâyıq olaraq saqlamaq kerekler, müfti ve imamlarnıñ bunı tüşünmesini isteymiz, amma bu ya da başqa insanlarğa begenilmesini degil. Akimiyet kele ve kete, insanlar, musulmanlar, hatırası qala, bir kimseniñ adı – temiz ya de lekelegen adı qala», – dey Çubarov.
O, Qurban bayramnı Qırım tışında qayd etmege mecbur olğanı ile bağlı yazıqsınuvını bildirdi. Meclis reisi Qırımnı Rusiye işğalinden sebep terk etmege mecbur olğan qırımtatarlarnıñ eñ yaqın zamanda Vatanğa qaytıp keleceginе ümüdini bildirdi.
«Qırım camilerinde toplaşmağa imkânımız olacağını bekleyim, yani anda olğanlar ile, olar topraqnı saqlaylar, camilerni qoruylar, ve andan ketmege mecbur olğanlar ile», – dey Meclis reisi .
Qırımtatarlarnıñ yetekçileri – Mustafa Cemilev ve Refat Çubarov bu sene, bıltır olğanı kibi, yarımada işğalinden ve Rusiye akimiyetiniñ Qırımğa kirmek yasağından sebep, Qurban bayramnı Kiyevde qayd ettiler.
Qurban bayram – acılıqnıñ soñunda, Oraza bayramdan 70 künden soñ qayd etilgen musulman bayramıdır.
