Cumaaqşamı künü, sentâbr 24-de, dünya musulmanları Qurban bayramnı qayd etеler. Qırımda bugün raatlıq künü ilân etilgen. Bu sene bayram sentâbr 27-ne qadar devam etecek.
Qırımtatarlarnıñ yetekçileri – Mustafa Cemilev ve Refat Çubarov bu sene, bıltır olğanı kibi, yarımada işğalinden ve Rusiye akimiyetiniñ Qırımğa kirmek yasağından sebep, Qurban bayramnı Kiyevde qayd etecekler. Olar bayram munasebeti ile cemaat namazına qoşulacaqlar. 24-de, bayram namazı saat 7:15 başlandı. Aqmescitte ibadet, adet üzre, Zenaat birligi medeniyet evinde keçti. Bugün bayram hutbesi ve namazını Qırım musulmanlarınıñ diniy yetekçisi hacı Emirali Ablayev keçirgen edi.
Aqyarda yaşağan musulmanlar içün Qurban bayramnıñ qayd etilmesi zor oldı, çünki akimiyet raatlıq kününi ilân etmege istemedi.
Bunıñ ile bayramnı Qırımnıñ «erzaq qamaçavı»nıñ iştirakçileri de qayd etecekler.
Qurban bayram – Oraza bayramdan 70 kün keçkeninden soñ qayd etilgen musulman bayramıdır.
