Qırımda sentâbr 22 künü 2014 senesi mayıs 3 künü qırımtatarlarnıñ yetekçisi Mustafa Cemilevni qarşılav tedbiri vaqtında uquq qoruyıcı organları temsilcilerine zarar ketirgeninde qabaatlanğan qırımtatar faalleri Tair Smedlâyev ve Edem Osmanovnıñ işi boyunca mahkeme toplaşuvları keçti.
Meclisniñ matbuat hızmeti bildirgeni kibi, mahkeme toplaşuvlarında teneffüs ilân etilgen, çünki mahkemege şaat kelmegen eken.
«Mahkemelerde Tair Smedlâyev ve Edem Osmanovnıñ delilleri baqılmalı, amma em qabaatlayıcı taraf, em imayeleri şaatnı diñlemek zaruriyeti aqqında bildirdi, şaat ise mahkemege kelmedi», – denile beyanatta.
Tair Smedlâyevni 2014 senesi oktâbr ayında yaqaladılar. 2014 senesi dekabr ayında Tair Smedlâyevni kefalet boyunca azat ettiler.
Edem Osmanov yanvar 19-da Aqmeçitte yaqarlıq noqtasında yaqalanğan edi. Onı 2014 senesi mayıs 3-te qırımtatar halqınıñ lideri Mustafa Cemilevni Ermeni Bazarda qarşılav aktsiyasında uquq qoruyıcı organlarnıñ hadimlerine qarşı küç qullanuvında şekleyler. Yanvar 21-de mahkeme onı eki ayğa apiske almağa qarar aldı. Fevral 25-te, «mayıs 3» işi boyunca yaqalanğan Edem Osmanovnı SİZOdan azat ettiler.
Evel Qırımnıñ rusiyeli prokuraturası Ermeni Bazarnıñ şeer mahkemesi Aqmescit rayonınıñ sakini 45 yaşında Edem Ebulisov «mayıs 3» işi boyunca qabaatlı olğanını bildirdi. Oña 40 biñ ruble miqdarında para cezasını berdiler.
