Qurban bayramını Qırım ile memuriy sıñırdaki kiriş noqtaları rayonlarında Qırımnıñ «erzaq qamaçavı»nıñ iştirakçileri de qayd etecek.
Qırım.Aqiqatqa «Qırım maydanında» çadır şeerçiginiñ komendantı Dilâver Seytumerov aytqanı kibi, sentâbr 24 künü bayram tedbirleri keçirilecek, 40 qoynı ketirip, aktsiya keçirilgen noqtalarğa tarqatmağa planlaştıralar.
«Tek musulmanlarnı degil de, diger din vekillerini de sıylaycaqmız», – dedi o.
Dilâver Seytumerov degeni kibi, ATR qırımtatar telekanalınıñ saibi Lenur İslâmov şahsen bayramğa 10 qoynı bere, bunıñ ile olarnı Ukraina ve Türkiye musulman cemiyetleri de berecek.
Qurban bayram – musulman bayramıdır, Qırımda regional bayram olaraq tanıla ve raatlıq künü sayla. Bu sene bayram sentâbr 24-27 künleri qayd etile.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.
