Link açıqlığı

Qırımtatar Milliy Meclisiniñ reisi, Ukraina Yuqarı Radasınıñ deputatı, Qırımnıñ «erzaq qamaçavı»nıñ teşebbüsçilerinden biri Refat Çubarov dey ki, işbu aktsiya işğal etilgen Qırım meselesini ekinci-üçünci sıradan birinci sırağa qaytardı.

Bunı o Qırım.Aqiqatqa bildirdi.

«Şimdi deyler ki, Meclis ve qırımtatarlarnıñ sayesinde qamaçav umumukrain aktsiyasına çevirile ve Qırım meselesini ekinci-üçünci sıradan birinci sırağa qaytarmağa yardım ete. Bundan qırımtatarlar bu aktsiyadan soñ ola bilecek adımlarnıñ neticesinde başlanması mümkün olğan muzakere ketişatınıñ tam subyektleri ola. Açıqtan aytayım: ögümizde böyle bir maqsat da bar edi», – dey Meclis reisi.

Evel Çubarov Qırım qamaçavınıñ nevbetteki basamağı – Qırımğa elektrik energiyasınıñ berilmemesi olacağı aqqında bildirgen edi.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırımnıñ rusiyeli akimiyeti böyle areketlerni takbih ete, amma yarımada sakinleri erzaq qamaçavınıñ aqibetlerini duymaz, dep tüşüne.

XS
SM
MD
LG