Link açıqlığı

Saatnıñ esas haberi

Yaltada Amet-Han Sultan hatırasına boks yarışı keçirilecek


Yaltada, sentâbr 25-27 künleri Sovet Birliginiñ eki defa Qaramanı Amet-Han Sultan hatırasına bağışlanğan boks yarışı keçirilecek.

Yalta şeer şurasınıñ matbuat hızmeti bildirgeni kibi, yarış beşinci sefer ötkerile, tedbir Qırımnıñ rusiyeli akimiyetiniñ başı Sergey Aksenovnıñ reberligi altında keçe.

«Bu sene yarışta Qırım, Rusiye, Ukraina, Özbekistan ve Qazahistannıñ 20 komandasını temsil etken 200 boksçu iştirak etecek. Eñ yaş iştirakçi – 11 yaşında. Yaltanı 17 sportçu temsil etecek – Amet-Han Sultan adına boks klubunıñ şegirti», – denile beyanatta.

Aynı zamanda, Ukraina boks federatsiyasınıñ resmiy saytında aşkâr etilgen boks yarışlarınıñ planında ukrain sportçularınıñ turnirdeki iştiraki yazılmağan.

Yalta şeer memuriyetiniñ matbuat hızmeti bildirgeni kibi, yarışnıñ açılışı sentâbr 25 künü Şeer bağçasında şardıvan yanında olacaq. Yarışlar olimpik sistemasına köre keçirile. Final yarışları ve ğaliplerniñ taqdirlevi sentâbr 27 künü ötkerilecek. Turnir teşkilâtçısı – Yalta şeeriniñ boks federatsiyası.

Sovetlerniñ uçucısı Amet-Han Sultan 603 cenk uçuşını yaptı, 30 uçaqnı şahsen ve 19 uçaqnı taqım içinde qırdı. Yaz işi devamında uçucı 100 uçuş vastasını ögrendi. 1971 senesi fevral 1-de Amet-Han Sultan Tu-16 uçuş laboratoriyasında sınav uçuşında elâk oldı. Moskvada defn etilgen edi.

XS
SM
MD
LG