Link açıqlığı

Qırımda jurnalistlerge Qırımtatar Milliy Meclisini añmamaq tevsiye eteler – matbuat vastaları


Qırımnıñ rusiyeli ükümetiniñ haber ve bağ siyaseti nazirligi Qırım matbuat vastalarına yarımadınıñ rusiyeli prokurorı Natalya Poklonskayanıñ jurnalistler tarafından «Qırımtatar Milliy Meclisi» adınıñ añılması ile bağlı «buyuruq»nı yolladı. Bu aqta ForPost Aqyar haber portalı bildire.

«Bu aqta mektüp Qırım ve Aqyarnıñ ileri matbuat vastalarına Qırım cumhuriyetiyeniñ haber ve bağ siyaseti nazirliginden keldi. Beyanatta Qırım cumhuriyeti prokurorı Natalya Poklonskayanıñ nazirlikke imzalağan mektübine esaslanalar. Mektüpte yazılğanı kibi, Qırım ve Aqyarda «Meclis», «Meclis idaresi», «Qırımtatar Milliy Meclisi» sözleri ile resmiy sürette qayd etilgen teşkilât yoq eken», – yazıla neşirde.

Bunıñ ile Poklonskaya dey ki, ticariy olmağan teşkilâtlar portalında aşkâr etilgen ticariy olmağan ve diniy teşkilâtlarnıñ esabat sistemasınıñ malümatına köre, Rusiye Federatsiyasında bu sözler ile tek eki cemaat birligi qayd etilgen: Tataristan Cumhuriyetiniñ tatar mırzalarınıñ Meclisi regional cemaat teşkilâtı ve «Meclis» musulman medeniyeti halqlarına ve diger milliy azlıqlarğa regional hayriye fondu, Moskva şeeri.

«Resmiy mektüpke esaslanıp, Qırım Cumhuriyetiniñ haber ve bağ siyaseti nazirligi Qırım Cumhuriyeti ve federal emiyeti olğan Aqyar şeeriniñ matbuat vastalarına haber süjetlerinde, maqale ve intervyüledre bar olmağan teşkilâtlarnıñ adlarını qullanmamaq çağıra», – denile vesiqada.

Qırımtatar Milliy Meclisi – 2014 senesi mart ayından Yuqarı Rada tarafından Ukraina territoriyasında qırımtatar halqınıñ icraiy organı olaraq tanılğan teşkilâttır. Ukraina ve Rusiye adliye nazirliginde cemaat-siyasiy teşkilât olaraq qayd etilmegen.

XS
SM
MD
LG