Qırım ile memuriy sıñırda yük maşinalarınıñ aydavcıları kiriş noqtalarını terk etip, qıtaiy Ukrainağa qaytalar.
Ukraina Devlet sıñır hızmetiniñ matbuat hızmeti bildirgeni kibi, salı künü, sentâbr 22-de, saat 18-ge, «Kalançak» kiriş noqtasında bir 39 yük maşinası qaldı. «Çaplinka»da – 54 yük maşinası. «Çonğar» noqtasında iç bir maşina yoq.
Ukraina Devlet sıñır hızmetinde deyler ki, sıñırcılar «Pravıy sektor» temsilcileri ile Qırım territoriyasına resmiy kiriş noqtaları etrafından keçken yollarnı qıdırğan ediler. Amma böyle yollar tapılmadı.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Qırımnıñ rusiyeli akimiyeti böyle areketlerni takbih ete, amma yarımada sakinleri erzaq qamaçavınıñ aqibetlerini duymaz, dep tüşüne.
