Qırım ve Aqyar müftisi acı Emirali Ablayev Moskvadaki Cuma Cami açılışında iştirak etecek. Bunı Qırım musulmanları diniy idaresiniñ matbuat hızmeti bildire.
Cuma Cami açılışı Moskvada Qurban bayramı arfesinde, sentâbr 23-te ötkerilecek. Tedbirge Qırım eyyeti de qoşulacaq.
«Tedbirde Rusiye Federatsiyasınıñ prezidenti Vladimir Putin, Türkiye Cumhuriyetiniñ prezidenti Recep Tayip Erdoğan, Filistin, Urdun, Katar, Küveyt, Saudiy Arabistan, Qazahistan, Qırğızistan, Azerbaycan, Turkmenistan, Tacikistan, İran, Özbekistan ve diger memleketlerniñ liderleri iştirak etecek», – dep aytıla haberde.
Moskva Cuma Camisi 1904 senesi tatar iş adamınıñ parasına qurulğan edi. Onı 2005 senesi tamir etmege başladılar. Böylece caminiñ meydanı 20 qat arttı. Yañı cami 10 biñ kişini sığdıracaq. Qurucılıq işlerine 170 million dollar sarf etildi. Mında 6 qat, 20 biñ metr kâre bar. Camide islamnıñ zemaneviy müzeyi de açılacaq. Umumen Moskvada, Cuma Caminen beraber, resmiy şekilde qayd etilgen beş cami bar.
Qırım.Aqiqat bildirgeni kibi, Aqmescitte Qurban bayramınıñ ekinci künü, sentâbr 25-te Cuma Caminiñ qurucılıq işleri başlaycaqtır.
