Link açıqlığı

«Azov» polkunıñ temsilcileri Qırım «qamaçavı»na qol tutmaq içün «Çonğar»ğa keldiler


Qırım ile memuriy sıñırğa salı künü, sentâbr 22-de, yarımada qamaçavına yardım köstermege istegen «Azov» polkunıñ temsilcileri keldi.

Qırım.Aqiqat mühbiri bildirgeni kibi, «Azov» yazısı ile futbolkalarnı kiygen bir qaç insan «Çonğar» kiriş noqtasına keldi, özlerini polk temsilcileri olaraq tanıttılar ve «Pravıy sektor» bazası yanında faaller ile muzakerelerni keçire.

Olarnıñ sözlerine köre, olar işğal etilgen Qırım ile memuriy sıñırda kiriş noqtalarınıñ qamaçavı boyunca aktsiya keçirilmesine yardım etmege isteyler.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırımnıñ rusiyeli akimiyeti böyle areketlerni takbih ete, amma yarımada sakinleri erzaq qamaçavınıñ aqibetlerini duymaz, dep tüşüne.

XS
SM
MD
LG