2014 senesi dekabr ayında qadar ükümette Rusiye tarafından işğal etilgen Qırımğa elektrik energiyasınıñ berilmesi ile bağlı meselelerni al etken Ukraina energetika ve kömür sanayı naziriniñ sabıq muavini Vadim Ulida dey ki, yarımadanıñ elektrika ile teminlevini toqtatmağa mümkün, amma buña Rusiye cevabı ola bilecek.
Bunı o Qırım.Aqiqatqa bildirdi.
«Ebet, elektrika teminlevi Ukrainağa bağlı, ağnı idare etken ve elektrik energiyasınıñ miqdarına tesir etken milliy merkezniñ tesiri büyük», – dedi o.
Onıñ tahminlerine köre, Qırımnıñ aqımsız qalacağına Rusiye tarafından cevap ola bile. Neticede, Ulida degeni kibi, ukrain energetika sistemasında qıtlıq peyda ola bile, qızdıruv mevsimi arfesinde memleketniñ bir çoq regionına menfiy tesirniñ olması mümkün.
Evel Qırımtatar Milliy Meclisniñ başı Refat Çubarov Qırımnıñ «erzaq qamaçavından» soñ energetik qurşavı ola bilecegi aqqında aytqan edi.
