Qırımtatarlarnıñ milliy yetekçisi, Ukraina prezidentiniñ qırımtatar halqınıñ işlerinden vekâletlisi Mustafa Cemilev dey ki, Qırımnıñ «erzaq qamaçavı»nıñ esas maqadı – Rusiye içün yarımada teminlevine masraflarnı arttırmaqtır. Şunıñ içün, dey o, qamaçav bir ay, yarım yıl devam ete bile.
Bu aqta o Nemetskaya volnağa bildirdi.
Cemilevniñ sözlerine köre, aktsiya iştirakçileriniñ nevbetteki talabı – Qırım ve Donbassqa elektrik energiyasınıñ berilmemesi olacaqtır.
«Biz em ay, em yarım yılğa azırmız. Qırımnıñ naqliyat qamaçavından ğayrı, biz Qırımnıñ elektrik teminleviniñ söndürilmesinde de israr etecekmiz, Ukraina ve Rusiye arasında işğal etilgen Donbass ve Qırımğa elektrik energiyasınıñ berilmesi aqta añlaşmanıñ lâğu etilmesinde. Rusiye elektrik energiyasını Donbassqa bere, Ukraina, öz nevbetinde, Qırımnı teminley. Bizimce, bu milliy menfaatımızğa ters kele», − dey Cemilev.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.
