Ukraina Yuqarı Radasınıñ deputatı, Ukraina prezidentiniñ keñeşçisi, Aqyar şeer devlet memuriyetiniñ sabıq başı Sergey Kunitsın dey ki, Qırımnıñ tam qamaçavı Rusiye tarafından işğal etilgen Qırımnıñ qaytarıluvına yardım etmez. Bunı o sentâbr 21 künü «Svoboda slova» efirinde bildirdi.
Onıñ fikrine köre, anda yaşağan insanlarğa Ukraina olarnı keri beklegenini köstermek kerek.
«Olarnı anda zulum etsek, territoriyanı qaytarıp olamamız, amma anda er şey pek yahşı olmasına da imkân bermemek kerekmiz», – dey o.
«Ebet, Qırımğa biñlerce yük maşinalarınıñ kelmesi ve Rusiye ordusınıñ aşatmasına qarşım, şunıñ içün bu yahşı bir varianttır», – dedi Kunitsın.
Evel Qırımtatar Milliy Meclisniñ başı Refat Çubarov Qırımnıñ «erzaq qamaçavından» soñ energetik qurşavı ola bilecegi aqqında aytqan edi.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.
