Qırım ile memuriy sıñırda yük maşinalarınıñ aydavcılarında vesiqalarnı teşkergen bir qaç taqiqat gruppası çalışa. Bu aqta Qırım.Aqiqatqa Herson vilâyetinde Ukraina İçki işler nazirliginiñ reber muavini İlya Kiva bildirdi.
Onıñ sözlerine köre, uquq qoruyıcı ve gümrük organlarınıñ temsilcilerinden ibaret olğan taqımlar yük maşinalarınıñ aydavcılarından vesiqalarnı, şu cümleden gümrük beyannamelerini teşkereler.
«Sentâbr 21 künü saat 14:00 vaziyet nezaret altındadır» – dedi Herson vilâyetinde Ukraina İçki işler nazirligi idaresiniñ reberi Artur Merikov.
«Yük maşinalarınıñ aydavcılarından militsiyağa şikâyet kelmey. Cemaat nizamınıñ bozuluvı qayd etilmegen», – deyler mında.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.
