Qırımda Rusiye FSB sıñır idaresi bildirgeni kibi, Herson vilâyeti tarafından alıp barılğan «mal qamaçavı»na baqmadan, kiriş noqtaları «daimiy sürette» çalışmağa devam ete.
Bunı Qırım.Aqiqatqa Qırım boyunca FSB sıñır idaresiniñ matbuat hızmeti Marina Boyenko bildirdi.
Aytqanı kibi, bazar künü, sentâbr 20-de, Qırımğa taba yük maşinaları qatnamay. Matbuat kâtibiniñ sözlerine binayen, sıñır noqtalarınıñ qoruvını arttırmağanlar.
«Arttırılğan qoruv, spetsnaz yoq, er şey adiy rejimde keçe», – qayd ete Boyenko.
Evel bildirilgeni kibi, sentâbr 21 künü Qırım.Aqiqat mühbirleri Qırım kirişinde Rusiye politsiya hadimleri ile avtobusnı kördiler.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.
