Herson vilâyetinde Qırım ile memuriy sıñırda iş adamı yarımadağa aşayt malını kirsetmege istemeyiр, onı qamaçav iştirakçilerine qaldırdı. Bir qaç tonna qartop aqqında söz kete.
Bunı Qırım.Aqiqatqa Geniçesk rayon devlet memuriyetiniñ başı Aleksandr Vorobyev bildirdi.
«İşbu aktsiyanıñ keçirilmesinde vatanperverlikniñ kerçek numayışıdır. Yük saibi vaziyetni añladı ve narazılıq köstermeyip, yükni qamaçav iştirakçilerine qaldırdı. İş adamınıñ ne adı, ne soyadını bilemiz, amma minnetdarlığımıznı bildiremiz», – dedi Vorobyev.
Onıñ sözlerine köre, eki maşinada 40 tonna qartop bap edi. Şimdi yükni aktsiya iştirakçileri arasında tarqatacaqlar: «Çonğar», «Kalançak» ve «Çaplinka» kiriş noqtalarına, qalğannı ATO zonasına yollaycaqlar.
İş adamınıñ izaatı yoqtır.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.
