Link açıqlığı

Qırımda ukrain vatanperverleri yarımadanıñ işğalden azat etilmesiniñ er angi usulına qol tutar – Kоstinskiy


Ukrainanıñ telekeorüv ve radioyayınlav boyunca milliy şurasınıñ azası, Qırım siyasetşınası Sergey Kоstinskiy Qırım qamaçavından sebep Rusiye tarafından 2014 senesi işğal etilgen yarımadada yaşağan qırımlılarnıñ Ukrainadan közü qaytmaz, dep tüşüne.

Bunı o «Qırım.Aqiqat» radio programması efirinde bildirdi.

«Qırım vaziyeti öyle oldı ki, ukrain vatanperverleri Qırımnıñ azat etilmesiniñ er angi usulına qol tutmağa azır. Rusiye tarafdarı olğanlar, elbet, onı destekleycek. Daa qarar almağanlar bar, amma olarnıñ mevamı, daima olğanı kibi, şaraitlerge bağlı olacaq», – dey Kоstinskiy.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.

Qırım.Aqiqat radiosı – Radio Svoboda ve Ukrainske radio Birinci kanalınıñ umumiy leyhasıdır. Programmanıñ birinci efiri bazarertesi künü, sentâbr 21-de, çıqtı. Programma er kün saat 8:35 ve 18:30 orta dalğalarda 549 kgts sıqlığında çıqacaq.

XS
SM
MD
LG