Link açıqlığı

ATR telekanalınıñ müdiri, Qırımnıñ «erzaq qamaçavı»nıñ teşebbüsçilerinden biri Lenur İslâmov yarımadağa malnı ketirgenlerniñ cedveli peyda olacağı aqqında bildire.

Bu aqta о Herson vilâyeti «Çonğar» kiriş noqtasında Qırım.Aqiqat mühbirine bildirdi.

Onıñ sözlerine köre, yaqında işbu cevdel tilizilip, aşkâr etilecek.

İslâmov işğal etilgen Qırımğa Hersondan qatnağan taksi aydavcılarınıñ ilerideki işi ile bağlı bazı planlarnı qayd etti.

«Qırımğa kirecek qıta taksileriniñ mahsus belgisi olacaq. Belgisi olmağanlar – kiremez», – dedi o.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırımnıñ rusiyeli başı Sergey Aksenov qamaçav teşkilâtçılarınıñ areketlerini takbih etti ve aqılları yerine kelecegine ümüdini bildirdi. Onıñ aytqanı kibi, Qırım akimiyeti ukrain malınıñ yoq olması neticesinde fiyatlarnıñ köterilmemesini taqip etecegini qayd etti.

Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.

XS
SM
MD
LG