Link açıqlığı

Saatnıñ esas haberi

Saba, sentâbr 21-de, Herson vilâyetinde Qırım ile memuriy sıñırda vaziyet sakindir, haber ete Qırım.Aqiqat mühbiri.

Şu cümleden, «Çonğar» kiriş noqtasında bir 300 insan bar, olarnıñ sırasında Meclis temsilcileri, vatanperverler, arbiy insanlar ve jurnalistler. Mında Qırımtatar Milliy Meclis reisi Refat Çubarov keldi.

«Kalançak» kiriş noqtasında, Qırım.Aqiqat mühbiri bildirgeni kibi, qıtaiy Ukraina tarafından turğan bir 90 yük maşinası bar, daa bir 20 maşina – bitaraf yolaqta. Aynı şu yerle bir yigirmi insan tura – arbiyler, qırımtatar bayrağı ile vatandaşlar, saba «Kalançak» noqtasına «OSCE» yazısı ile eki maşina keldi.

Qırım jurnalistleri bildirgeni kibi, «Çaplinka» kiriş noqtasında bir seksen yük maşinası tura.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırımnıñ rusiyeli başı Sergey Aksenov qamaçav teşkilâtçılarınıñ areketlerini takbih etti ve aqılları yerine kelecegine ümüdini bildirdi. Onıñ aytqanı kibi, Qırım akimiyeti ukrain malınıñ yoq olması neticesinde fiyatlarnıñ köterilmemesini taqip etecegini qayd etti.

Ukraina Devlet sıñır hızmetiniñ malümatına köre, Qırımğa yol açqan noqtalarda 150-200 yük maşinası toplanğan.

XS
SM
MD
LG