Link açıqlığı

Qırım ile memuriy sıñırda vaziyet tınç ve kontrol etilgen – Ukraina İçki işler nazirligi


Herson vilâyetinde Ukraina İçki işler nazirliginiñ idaresi Qırımğa kiriş noqtalarında vaziyetniñ tınç ve kotrol etilgeni aqta bildire. Bu aqqında Ukraina İçki işler nazirligi saytında aytıla.

«Herson vilâyetinde Ukraina İçki işler nazirliginiñ idaresi bergen malümatqa köre, «Çonğar», «Kalançak» ve «Çaplınka» nezaret-kiriş noqtalarında vaziyet sakindir. Avto yolları blok etilmegen, yengil ve yolcu naqliyatı maniasız keçe. Kiriş noqtaları yanında toplanğan vatandaşlar ve naqliyat vastalarınıñ aydavcıları ile militsiya hadimleri cemaat nizamınıñ bozulmaması boyunca işlerni keçire», – denile beyanatta.

Qırım ile memuriy sıñırda üç nezaret-kiriş noqtası bar: Çaplınka, Çonğar ve Kalançak.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırımnıñ rusiyeli başı Sergey Aksenov qamaçav teşkilâtçılarınıñ areketlerini takbih etti ve aqılları yerine kelecegine ümüdini bildirdi. Onıñ aytqanı kibi, Qırım akimiyeti ukrain malınıñ yoq olması neticesinde fiyatlarnıñ köterilmemesini taqip etecegini qayd etti.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ Qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG