Yük maşinalarınıñ aydavcıları Herson vilâyeti tarafından bazar künü «Kalançak» kiriş noqtasında eki kilometrlik nevbetni teşkil ettiеle. Qırımğa yarımadanıñ «erzaq qamaçavı» başlanmasına qadar kirip yetiştirmegen maşinalardır. Aydavcılar arasından kerginlik ve açuv arta, haber ete Qırım.Aqiqat mühbiri.
Sentâbr 20 künü, üyleden soñ, DAİ hadimleri Rusiye tarafından işğal etilgen Qırımğa endi yük maşinalarını kirsetmey edi. Qırımtatarlarnıñ yolbaşçılarını ve qamaçavnıñ başlanmasını beklegen matbuat vastalarınıñ hadimleri sıñır bekçileriniñ acele etip, birden beşer arabanı kirsetkenini körgenler. Amma saat 15:00 soñ «Kalançak» kiriş noqtasına qırımtatar, ukarin vatanperver küçleri ve yerli sakinler kelip, Qırım yönelişine yük maşinalarınñı qatnavını blok ettiler.
Aydavcılarnıñ çoqusı tez bozulğan malnı ketire, şunıñ içün aydavcılar qamaçavdan çorlana.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
