Qırımtatar Milliy Meclisi, Ukraina Yuqarı Şurasınıñ deputatı Refat Çubarov dey ki, Rusiye tarafından işğal etilgen Qırımnıñ «mal qamaçavı»ndan soñ qırımtatarlar yarımadağa energiya berilmesiniñ toqtatılmasını talap etecekler.
Bunı sentâbr 18 kügü Geniçesk rayon devlet memuriyetinde teşkiliy şuranıñ toplaşuvında bildirdi, haber ete Qırım.Aqiqat mühbiri.
Çubarov dey ki, yaqında Ukraina prezidenti Petro Poroşenko ile keçirilgen muzakerelerde Qırım qamaçavı ile birlikte işğal etilgen yarımadağa elektrik energiyasınıñ berilmesini toqtatmaq kibi meseleni kötergen edi eken.
«İşğalciler başta bizge qarşı areketlerini tüşünmeycek. Amma soñ oktâbr bar. Tünevin prezidentke açıqtan ayttıq, olar insan aqlarına riayet etmeseler, anda ne sebepten elektrik energiyasını berecekmiz», – dey Çubarov.
Qırım.Aqiqatnıñ Qırımğa elektrik energiyasınıñ berilmesini ne vaqıt toqtatacaqlar degen sualine Meclis reisi buña cevap bermege daa erte olğanını qayd etti.
«Belki olar (işğalciler – QA) Qırımdan keter, Keriç boğazından», – dey o.
Teşkiliy şuranıñ toplaşuvında aktsiya keçirilmesi içün yer ayırmağa qarar aldılar. Anda çadırlar qoyulacaq, elektrik energiyası keçirilecek, cıyıştıruv ve çöplükniñ çıqariluvı teşkil etilecek ve ilâhre.
Herson militsiyası işğal etilgen Qırımğa yük maşinalarınıñ kirişini blok etecek faaller içün çadır ve keneflerni qoyacaq.
Qırımtatarlar sentâbr 20 künü, üylede, Rusiye tarafından işğal etilgen Qırımğa mahsulatnı ketirgen yük maşinalarınıñ areketini blok etecek olalar.
