«Ukraina Pridnestrovyelilerniñ birligi» cemaat teşkilâtınıñ faalleri tanılmağan Pridnestrovye Moldav Cumhuriyeti ile sıñırnı qapatmaq isteyler ve böyleliknen işğal etilgen Qırım ile memuriy sıñırnıñ blok etilmesi boyunca qırımtatarlarnıñ aktsiyasına qol tutacaq olalar.
«Qırımnıñ Rusiye işğaline qarşılıqnı kösterip, 21-de Qırım ile sıñırnı qapatacaq qırımtatarlarğa qol tutıp, Pridnestrovye ile sıñırnı qapatacaqmız, çünki Pridnestrovye iqtisat ceetinde 100% Ukrainadan teminlene», – bildirdi «Novıy region»ğa cemaat teşkilâtınıñ reisi Oleg Hvoşçevskiy.
Onıñ sözlerine köre, safdaşları Pridnestrovye ile sıñırnı Moldova tarafından da qapatmağa niyet ete.
Faali degeni kibi, Ukraina tarafından «Kuçurganı», Moldova tarafından «Benderı» kiriş noqtası qapatılacaq.
Qırımtatarlar sentâbr 20 künü, üylede, Rusiye tarafından işğal etilgen Qırımğa mahsulatnı ketirgen yük maşinalarınıñ areketini blok etecek olalar..
