Herson vilâyetiniñ başı Andrey Putilov qırımtatar faalleri tarafından sentâbr 20 künü başlanılacaq Qırımnıñ «mal qamaçavına» kene bir kere öz destegini bildirdi. Onıñ sözlerine köre, işbu aktsiyanı «Çonğarda Qırım maydanı» olaraq adlaylar, haber ete UNN.
«Bu aktsiyanı Çonğarda Qırım maydanı kibi adladılar. Qırımtatarlarnıñ işğal etilgen Qırımda işğalci memleket siyasetine qarşılıqnı köstermek ıntıluvına qol tutam. Kerçekten de işğalcilerni aşatmağa mümkün degil. Qırımtatar Milliy Meclisniñ yetekçisi Refat Çubarov ile laf ettim ve aktsiya iştirakçilerine qol tutmağa söz berdim. Refat Çubarovnı uquq çıqarıcı seviyede mal qamaçavını resmiyleştirmege çağırdım», – dedi Putilov.
Herson vilâyetiniñ başı şunı da bildirdi ki, sentâbr 18 künü Geniçesk rayonında aktsiyanıñ teşkiliy komiteti toplaştı, mında kiriş noqtasından 10 km uzaqlığında aktsiya iştirakçilerine yer ayırmağa qarar aldılar.
Herson militsiyası işğal etilgen Qırımğa yük maşinalarınıñ kirişini blok etecek faaller içün çadır ve keneflerni qoyacaq.
Qırımtatarlar sentâbr 20 künü, üylede, Rusiye tarafından işğal etilgen Qırımğa mahsulatnı ketirgen yük maşinalarınıñ areketini blok etecek olalar.
