Herson vilâyetinde Ukraina Devlet avto inspektsiyası (DAİ) bu raatlıq künlerine planlaştırılğan qamaçavdan sebep yük maşinalarınıñ aydavcılarını ola bilecek qıyınılıqlar aqqında tenbiyeley.
Bu aqta Herson vilâyetiniñ DAİ saytında aytıla.
«Sentâbr 20 künü üyleden soñ qırımtatar faalleriniñ Qırımnen memuriy sıñırnıñ qamaçavı ile bağlı devamlı aktsiyası başlana. Şu künü faaller Ukrainadan işğal etilgen yarımadağa ketken yollarda sanaiy ve aşayt mallarını taşığan yük maşinalarınıñ areketini qapata bile», – denile beyanatta.
Şu cümleden, DAİ Herson vilâyeti boyunca Kalançatsk rayonı M-17 «Herson – Canköy – Kefe – Keriç» yolunda, Çaplinsk rayonı M-18 «Harkov – Aqmescit – Aluşta» ve T-2202 «Yañı Kahovka – Ermeni Bazar» yolunda yük naqliyatınıñ areket etüvinde manialar ola bile.
DAİ aydavcılarğa öz marşrutlarını buña köre planlaştırmağa tevsiye eteler. Mında şunı da qayd eteler ki, aktsiya iştirakçileri vatandaşlarnıñ areketine keder etmeycekler.
Herson militsiyası işğal etilgen Qırımğa yük maşinalarınıñ kirişini blok etecek faaller içün çadır ve keneflerni qoyacaq.
