Herson militsiyası işğal etilgen Qırımğa yük maşinalarınıñ kirişini blok etecek faaller içün çadır ve keneflerni qoyacaq. Bu aqta Qırım.Aqiqat mühbirine Herson vilâyetinde İçki işler nazirliginiñ idaresi başınıñ muavini İlya Kiva bildirdi.
«Çadır şeerçigi, keneflerni azırlaymız, suv, erzaqnı ketiremiz», – dey Kiva.
İçki işler nazirliginiñ idaresi başınıñ muavini şunı da qayd etti ki, çadırlarnı sıñırnıñ er üç yönelişinde de quracaqlar, miqdarı qamaçavda iştirak etecek faallerniñ sayısına bağlı.
«Milliy gvardiyanı celp ettik, bugün vaziyetni tam nezaret etemiz, faaller ile, aktsiyağa qoşulmağa istegen teşkilâtlar ile muşaverelerni keçiremiz. Bu esnasnıñ nezaret altında olğanını isteymiz, aleket olmasın, duşmanımız bunı memleket vaziyetini kerginleştirmek içün qullanmamalı», – dey Kiva.
Qırımtatarlar Rusiye tarafından işğal etilgen Qırımğa malnı ketirgen yük maşinalarnıñ areketini sentâbr 20 künü, üylede, blok etecek ola.
