Link açıqlığı

Halq deputatı Logvinskiy: Aksenov oquv yurtunıñ mezunı olğanı aqqında yalanı içün mesüliyet çekmeli


Ukraina halq deputatı Georgiy Logvinskiy dey ki, Qırımnıñ rusiyeli başı Sergey Aksenov Aqmescit yuqarı arbiy-siyasiy qurucılıq oquv yurtunıñ mezunı olğanı aqqında yalan malümatnıñ tarqatıluvı sebebinden em Rusiye, em Ukraina qanuniyetine köre mesüliyet çekmeli. Bunı o Qırım.Aqiqatqa bildirdi.

«Qanuniyetke köre, menimce, Ukraina Cinaiy kodeksiniñ 358-inci maddesi ve Rusiye Federatsiyası Cinaiy kodeksiniñ 327-nci maddesi boyunca cinayet erkânı bar. Fikrime köre, Ukraina ve Rusiye uquq qoruyıcı organları bu beyanatqa seslenmeli», – dey Logvinskiy.

Deputat aytqanı kibi, Rusiye tarafı, belki, buña cevap bermez, amma Aksenovnıñ areketlerine Qırımda yaşağan Ukraina vatandaşları qıymet kesmeli.

Qırımnıñ rusiyeli başı Sergey Aksenovnıñ Aqmescit yuqarı arbiy-ssiyasiy qurucılıq oquv yurtunıñ (SVVPSU) mezunı olğanı aqqında malümat aqiqatqa uymay. Ukraina nazirliginiñ malümatına köre, arhiv vesiqalarınıñ teşkerüvi yapıldı ve neticede belli olğanı kibi, 1993 senesi iyün ayında Aksenovnı terbiyesizligi sebebeinden oquv yurtundan quvdılar.

Sergey Aksenovnıñ özü arbiy oquv yurtundan quvulğanını ne tasdiqladı, ne red etti. Onıñ SVVPSU diplomı barmı degen sualge Qırımnıñ rusiyeli başınıñ matbuat hızmeti onıñ resmiy saytında olğan tercimeialı ile tanış olmağa teklif etti.

Aksenovnıñ saytında aşkâr etilgen tercimeialında aytılğanı kibi, o 1993 senesi Aqmescit yuqarı arbiy-siyasiy qurucılıq oquv yurtunı bitirdi.

XS
SM
MD
LG