Qırımnıñ rusiyeli başı Sergey Aksenovnıñ Aqmescit yuqarı arbiy-ssiyasiy qurucılıq oquv yurtunıñ (SVVPSU) mezunı olğanı aqqında malümat aqiqatqa uymay. Bu aqta Ukraina mudafaa naziri Stepan Poltoraknıñ deputat Georgiy Logvinskiyniñ soravına olğan cevabında aytıla. Vesiqanıñ kоpiyasını Qırım.Aqiqat aşkâr ete.
Ukraina nazirliginiñ malümatına köre, arhiv vesiqalarınıñ teşkerüvi yapıldı ve neticede belli olğanı kibi, 1993 senesi iyün ayında Aksenovnı terbiyesizligi sebebeinden oquv yurtundan quvdılar.
«07.06.1993 senesi SVVPSU başlığınıñ № 0107 emirinde aytıla: «Kursant Aksenov Sergey Valeryeviçni – terbiyesizligi sebebinden quvmaq, şahsiy erkân cevdelinden çıqarmaq ve Moldova Cumhuriyeti Beltsı şeerine yollamaq», – denile vesiqada.
Bunıñ ile şunı bildireler ki, SVVPSU diplomlarınıñ berilmesi kitabında Aksenov diplomınıñ nomerası qayd etilgen. Amma işbu yazını qalem ile sızdılar, «diplomnı elde etken şahısnıñ imzası» yerinde imza bar.
Amma, nazirlik bildiregni kibi, diplomlarnıñ kopiyaları ve SVVPSU «Devlet imtian komissiyasınıñ esabatı ve qararı»nda Aksenovnıñ adı yoq.
Sergey Aksenovnıñ özü arbiy oquv yurtundan quvulğanını ne tasdiqladı, ne red etti. Onıñ SVVPSU diplomı barmı degen sualge Qırımnıñ rusiyeli başınıñ matbuat hızmeti onıñ resmiy saytında olğan tercimeialı ile tanış olmağa teklif etti.
«Qırım Cumhuriyeti Başınıñ matbuat hızmeti ve haber idaresi bildirgeni kibi, Qırım Cumhuriyeti Başınıñ, Qırım Cumhuriyeti Nazirler şurasınıñ reisi Sergey Aksenovnıñ tafsilâtlı tercimeialı ile Qırım Cumhuriyetiñ Ükümeti Portalında tanış ola bilesiñiz», – deyler matbuat hızmetinde.
Aksenovnıñ saytında aşkâr etilgen tercimeialında aytılğanı kibi, o 1993 senesi Aqmescit yuqarı arbiy-siyasiy qurucılıq oquv yurtunı bitirdi.
