Ukraina Yuqarı Şurasınıñ «Qırım» firqalarara deputat birligi qırımtatar yetekçileriniñ Qırım ile sıñırnıñ qapatılmasına qol tutqanını bildire.
Bu aqta «Petro Poroşenkonıñ bloku» firqasınıñ matbuat hızmeti tarafından aşkâr etilgen deputat birliginiñ arizasında aytıla.
«Ukraina Yuqarı Şurasında «Qırım» firqalarara deputat birligi qırımtatarlarnıñ Qırım ve qıtaiy Ukraina arasında yolnıñ qapatılması boyunca vatandaşlıq teşebbüsine qol tuta», – denile bildirüvde.
Qayd etilgeni kibi, «Qırımnıñ qıtaiy Ukraina ile yolunıñ qapatılması ilk evelâ Kremlniñ işğalci rejimine qarşıdır».
«Qamaçav yarımadanıñ işğal etilgen territoriyalarındaki vaziyetten Kremlniñ maliyeviy ve içtimaiy mesüliуetine ketirmeli. Qırımğa sanaiy teminlev, suv ve elektrik energiyasınıñ 80% Rusiyeden degil, qıtaiy Ukrainadan ketirile. Halqara qaidelerge köre, işğal etilgen territoriyalarnıñ uquqiy, maliyeviy ve içtimaiy vaziyeti içün işğalci mesüliyetlidir», – denile beyanatta.
Deputatlar yerli akimiyetniñ mevamı ile razı olmağanlar vatandaşlarnıñ, şu cümleden qırımtatarlarnıñ aqları bozulğanı, Ukraina vatandaşları üzerinde Rusiyede keçirilgen mahkemelerni hatırlattılar ve yarımada sakinlerini «siyasiy mabüsler» olaraq adladılar.
«Siyasiy mabüsler degende Qırım yarımadasınıñ ealisini nazarda tutmalımız. Qırım yarımadasınıñ sakinleri Kremlniñ iradesiz reineleridir», – deyler deputatlar ve halqara cemaatçılıqnı Qırım vaziyetine diqqat ayırmağa ve «Ukrainağa yarımdanıñ bir 2 million reinesiniñ azat etilmesine» yardım etmege çağırdılar.
Hatırlatamız, qırımtatarlarnıñ yetekçileri Qırım ile memuriy sıñırnı blok etip, işğalci yarımadağa ukrain malınıñ ketirilmesini toqtatmaq niyetindeler. Qırımtatar halqınıñ milliy yetekçisi Mustafa Cemilev aytqanı kibi, «Ukraina Qırmınıñ işğalci rejimini temin etmemeli».
Qırımnıñ rusiyeli başı Sergey Aksenov yarımada qıtaiy Ukrainadan malnıñ ketirilmemesine bütünley azır olğanını bildirdi. Bu mevzuda «iç te qorqu olmağanını» da qayd etti.
Qırımtatar Milliy Meclisiniñ reisi, Ukraina Yuqarı Şurasınıñ deputatı Refat Çubarov sentâbr 16 künü parlament toplaşuvında bildirgeni kibi, qırımtatarlar sentâbr 20 künü, üylede, Rusiye tarafından işğal etilgen Qırımğa mahsulatnı ketirgen yük maşinalarınıñ areketini blok etmek niyetindeler.
Ekspertler Qırımğa ukrain malınıñ ketirilmemesi ile bağlı aktsiyanı – qaparcılıqqa cevap olaraq adladılar. Ukrainanıñ icraiy akimiyeti ve prezidenti Petro Poroşenko qırımtatarlarnı Qırım ile memuriy sıñırnıñ qamaçavı ile bağlı niyetlerini izaatlamaylar.
