Qırım 2014 senesi mart ayında Rusiye Federatsiyası tarafından işğal etilgeninden soñ yarımadada insan aqları ve serbestligi ile bağlı vaziyetniñ beterleşüvi qayd etile, bu aqta OSCE demokratik institutlar ve insan aqları boyunca bürosında (ODIHR) ve OSCE milliy azlıqlar işleri boyunca Yuqarı komissarınıñ sentâbr 17 künü aşkâr etilgen maruzasında aytıla.
Maruzada aytılğanı kibi, Qırımda eñ ağır vaziyette Ukraina tarafdarları, jurnalistler ve qırımtatar ealisi buluna.
«Toplaşuv, birlikler serbestligi, fikir bildirüvleri Qırım akimiyeti tarafından yasaqlanğandır. Bunı Rusiye Federatsiyasınıñ sıñırlayıcı qanunlarında ve muhalif baqışlarını köstergen insan, matbuat vastaları ve cemitlerniñ temsilcilerine etilgen basqısında köremiz», – dey ODIHR müdiri Michael Georg Link.
Yuz saifeden ibaret olğan maruza 100-den ziyade vatandaş, ukrain akimiyetiniñ temsilcileri, Qırım sakinleri, köçip kelgen ve Qırım qıtaiy Ukraina arasında seyahat etken insanlarnıñ izaatlarına köre yazılğandır.
«Qırımda Ukraina topraq bütünligine açıqtan qol tutqan, Rusiye vatandaşlığından vazgeçken, şimdiki akimiyetni tanımağan ukrain ve qırımtatarlar pek ağır vaziyetke tüşkenini ögrendik», – dedi OSCE milliy azlıqlar işlerinden yuqarı komissarı Astrid Thors.
Onıñ sözlerine köre, yarımada işğalinden soñ qırımtatar ve ukrainler «medeniy ve siyasiy baqışlarını bildirmek ıntıluvları sebebinden basqı altındalar».
