«Ukrayinskıy dim» Qırım emek ve medeniy işbirlik merkezi»niñ reisi Andrey Şçekun «Qırım» serbest iqtisadiy zonası aqqında qanunnıñ lâğu etilmesine ve bu kibi zonanıñ Herson vilâyetinde teşkil etilmesine qol tuta.
Bunı o Qırım.Aqiqatqa bildire.
«Serbest iqtisadiy zona ne demektir? Yatırımlarnıñ celp etilmesidir. İşğal etilgen territoriyağa yatırımlarnı celp etmege mumkünmi? Dünya sanktsiyalarnı kirsete, Ukraina SİZ aqqında qanunnı qabul ete, Rusiye Federatsiyası da aynısını 25 yılğa etti. Menimce, devlet hainligi ya da rus-ukrain biznes menfaatınıñ tüşünmesidir. Bu qanunnı lâğu etmege ve SİZni Herson vilâyetinde teşkil etmege kerek, vilâyet üç qat ilerilesin, Ukraina diger regionlarından eñ eyisi olsun. Qırımlılar anda barıp, Herson inkişaf ete, Qırım ise ne içün zevalda olğanını añlasın», – dey Şçekun.
O şunı da qayd etti ki, bu teşebbüs «Tış işler maydanı» tarafından işlep çıqarılğan Qırım qaytarıluvı strategiyasında yazılğan eken.
Hatırlatamız, qırımtatarlarnıñ yetekçileri Qırım ile memuriy sıñırnı blok etip, işğalci yarımadağa ukrain malınıñ ketirilmesini toqtatmaq niyetindeler. Qırımtatar halqınıñ milliy yetekçisi Mustafa Cemilev aytqanı kibi, «Ukraina Qırmınıñ işğalci rejimini temin etmemeli».
Qırımnıñ rusiyeli başı Sergey Aksenov yarımada qıtaiy Ukrainadan malnıñ ketirilmemesine bütünley azır olğanını bildirdi. Bu mevzuda «iç te qorqu olmağanını» da qayd etti.
Qırımtatar Milliy Meclisiniñ reisi, Ukraina Yuqarı Şurasınıñ deputatı Refat Çubarov sentâbr 16 künü parlament toplaşuvında bildirgeni kibi, qırımtatarlar sentâbr 20 künü, üylede, Rusiye tarafından işğal etilgen Qırımğa mahsulatnı ketirgen yük maşinalarınıñ areketini blok etmek niyetindeler.
