Qırım Muhtar Cumhuriyeti ve Aqyar meseleleri boyunca Ukraina devlet hızmeti Qırımtatar Milliy Meclisiniñ yarımada ile naqliyat alâqasını blok etmek niyetini izaatlamay. Bunı Kiyevde çarşenbe künü, sentâbr 16-da, «Ukrayinskıy dim» Qırım emek ve medeniy işbirlik merkezi»niñ reisi Andrey Şçekun bildirdi, haber ete Qırım.Aqiqat mühbiri.
Andrey Şçekun dey ki, devlet hızmeti alâ daa çalışmay: «Qırım meseleleri boyunca devlet hızmetiniñ mevamını eşitmege isteymiz. Çünki bugün anda yalıñız karyeranı tüşüneler».
Cemaat faali QMC ve Aqyar meselelerinden devlet hızmetiniñ sabıq başı Aslan Ömer Kırımlını Meclisniñ qıtaiy Ukraina Qırım arasında naqliyat alâqasını blok etmek niyetini izaatlamağa çağırdı.
O, Qırım işğali ile bağlı meselelernen oğraşmağa mecbur olğan devlet akimiyeti organlarınıñ qırımlılarnıñ cemaat teşkilâtları ile bağı qaviy olmağanını qayd etti. Şçekun Ukraina İçki işler nazirliginiñ hadimleri Herson vilâyeti ve Qırımnıñ memuriy sıñırını blok etecek faallerniñ havfsızlığını temin etip olacağından şübesini bildirdi.
Avgust 19 künü Nazirler Kabineti QMC ve Aqyar şeeri meselelerinden Ukraina Devlet hızmetiniñ başı vazifesine Nariman Ustayevni tayinledi. Bu vazifeni eda etken Aslan Ömer Kırımlı Qırım ve Aqyar meselelerinden akimiyet vekâletlisi oldı.
Hatırlatamız, qırımtatarlarnıñ yetekçileri Qırım ile memuriy sıñırnı blok etip, işğalci yarımadağa ukrain malınıñ ketirilmesini toqtatmaq niyetindeler. Qırımtatar halqınıñ milliy yetekçisi Mustafa Cemilev aytqanı kibi, «Ukraina Qırmınıñ işğalci rejimini temin etmemeli».
Qırımnıñ rusiyeli başı Sergey Aksenov yarımada qıtaiy Ukrainadan malnıñ ketirilmemesine bütünley azır olğanını bildirdi. Bu mevzuda «iç te qorqu olmağanını» da qayd etti.
Qırımtatar Milliy Meclisiniñ reisi, Ukraina Yuqarı Şurasınıñ deputatı Refat Çubarov sentâbr 16 künü parlament toplaşuvında bildirgeni kibi, qırımtatarlar sentâbr 20 künü, üylede, Rusiye tarafından işğal etilgen Qırımğa mahsulatnı ketirgen yük maşinalarınıñ areketini blok etmek niyetindeler.
