Link açıqlığı

Qırımnıñ rusiyeli Devlet şurasınıñ reisi Vladimir Konstantinov Rusiye tarafından işğal etilgen yarımada sakinleri «Ukraina ne olğanını unutqanından» emindir.

Bu aqta Konstantinovnıñ Facebook saifesinde aytıla.

«Qırımlılar Ukraina ne olğanını bir tez unutqanlar, sanki onda 23 yıl yaşamadılar bile. Qırım şeer ve rayonlarında qırımlılar ile körüşkende, kimse «Ukraina» sözüni aytmağanını qayd ettim. Yıl içinde grivna ne olğanını unuttılar. Qırımlılar endi öz taqdirini evelki memleketke bağlamay, Rusiyeniñ muvafaqiyetleri ve abadanlığına bağlağan öz şahsiy meseleleriniñ çezilmesini tüşüneler artıq», – denile beyanatta.

Konstantinovnıñ fikrine köre, Qırım içün «Ukraina devletinde olğanından Rusiye terkibinde olmağa daa da tabiiydir».

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ Qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Ukraina prezidenti Petro Poroşenko sentâbr 11-de er yıllıq «Yalta Avropa Strategiyası» (YES) körüşüvinde çıqışta bulunıp, Ukraina Rusiye tarafından işğal etilgen Qırım üzerinde nezaretini qaytarmağa planlaştırğanını bildirdi.

XS
SM
MD
LG