«Ukrayinskıy dim» Qırım emek ve medeniy işbirlik merkezi»niñ reisi Andrey Şçekun dey ki, raatlıq künleri planlaştırılğan «mal qamaçavı» faaller içün havflı ola bile. Onıñ sözlerine köre, şimdilik «işbu adımlarnıñ tafsilâtları, suvastı taşçıqları ve aqibetleri» belgisiz, aktsiya iştirakçileriniñ havfsızlığı meselesi de belli degil.
Bunı o Qırım.Aqiqatqa bildirdi.
«Bu qamaçav ile bağlı qorqumız bar, tarikler ola bile, Avakov (Ukraina İçki işler naziri – QA) er şey nezaret altında olacağını bildirse de, bu kontrolni yaqında Yuqarı Rada binası yanında kördik, soñra ise faallerniñ taqibi, siyasiy taqibi», – hatırlata Şçekun.
Böyle şaraitlerde o, qırımtatarlarnıñ yetekçileri tarafından ilân etilgen «mal qamaçavına» qoşulmaq imkâniyetini körmey. Cemaatçı şunı da bildire ki, «Qırımnıñ serbest iqtisadiy zonası aqqında qanun lâğu etilmeli, qamaçavnı bütün olğan aletlerniñ qullanıluvı ile keçirmege kerek».
Evel cemaatçı Qırım Muhtar Cumhuriyeti ve Aqyar meseleleri boyunca Ukraina Delvеt hızmetini Qırım qamaçavına qıymet kesmege çağırğan edi.
Hatırlatamız, qırımtatarlarnıñ yetekçileri Qırım ile memuriy sıñırnı blok etip, işğalci yarımadağa ukrain malınıñ ketirilmesini toqtatmaq niyetindeler. Qırımtatar halqınıñ milliy yetekçisi Mustafa Cemilev aytqanı kibi, «Ukraina Qırmınıñ işğalci rejimini temin etmemeli».
Qırımnıñ rusiyeli başı Sergey Aksenov yarımada qıtaiy Ukrainadan malnıñ ketirilmemesine bütünley azır olğanını bildirdi. Bu mevzuda «iç te qorqu olmağanını» da qayd etti.
Qırımtatar Milliy Meclisiniñ reisi, Ukraina Yuqarı Şurasınıñ deputatı Refat Çubarov sentâbr 16 künü parlament toplaşuvında bildirgeni kibi, qırımtatarlar sentâbr 20 künü, üylede, Rusiye tarafından işğal etilgen Qırımğa mahsulatnı ketirgen yük maşinalarınıñ areketini blok etmek niyetindeler.
