Qırımtatarlar Qırım meselesiniñ zorbalıqsız çezilmesiniñ tarafdarıdır, dedi Ukraina prezidentiniñ qırımtatar halqınıñ işlerinden vekâletlisi Mustafa Cemilev Avropa birliginiñ 28 elçisi ile körüşüvde.
Körüşüvde Cemilev «Qırımda milletlerara ayırım meydanğa ketirilgeni» aqqında tarif etti, haber ete sentâbr 16 künü vekâletliniñ matbuat hızmeti.
«Sanki halqnı tarik etmege isteyler. Amma biz er vaqıt küç qullanuvı ile qarşılıqtan saqınmağa çağıramız. Ziddiyetniñ arbiy çezilmesini körmeymiz. Aksine, buña qarşımız», – dedi qırımtatarlarnıñ yetekçisi.
Cemilev Qırım Rusiye tarafından işğal etilgeninden soñ qırımtatarlarnıñ evleri, cami ve mekteplerinde Rusiye mahsus hızmetleri bir 160 tintüv keçirgeni aqqında bildirdi.
«Bu kibi şovinist areketleri atta sovet zamanları yapılmay edi. Vatandaşlarımıznı qorquzıp, Vatanını terk etmege mecbur etecek olalar», – dedi Mustafa Cemilev.
O, yarımadada «Rusiye ordusınıñ bir 80 biñ arbiy hızmetçisi bar olğanını» qayd etti, özek havfı aqqında tenbiye etken belgiler ile maşinalar peyda ola. «Qırımğa endi özek silâsı ketirilgeni aqqında aytmağa mümkün», – dey Cemilev.
Qırım Rusiye tarafından 2014 senesi fevral 20 künü işğal etildi. Ukraina Yuqarı Şurası yarımadanıñ muvaqqat işğali aynı şu künü başlanğanını bildirе.
