Link açıqlığı

Kiyevde sentâbr 15 künü «Qırım ukraince» novellalar cıyıntığı taqdim etildi, kitapqa «Krayina» mecmuasından «Novella ukraince» yarışında ğalebe qazanğan müelliflerniñ ukrain tilinde yazılğan 23 küçük eseri kirdi, haber ete Qırım.Aqiqat mühbiri.

Teşkilâtçılarnıñ malümatına köre, eser mevzusı serbest edi, yeri ise – Qırım, müelliflerge böyle şart qoyulğan edi.

«Bıltır «Maydan» mevzusı edi, bu sene Qırımdan müim mesele olmağanını tüşündik. Yarışnı biz «Krayina» mecmuası içün keçirdik, «edebiyat» bölügini yahşı ve qısqa eserler ile toldurmaq maqsadı ile, çünki ukrain müellifleri uzun yaza, aqiqaten ise isabetli, suratlı ve parlaq obrazlar ile eserler kerektir, tez oqulacaq ve yazılacaq soyları», – dey yarış teşkilâtçısı, «Krayina» mecmuasınıñ «Medeniyet» bölüginiñ muarriri Yelena Pavlova.

Umumen muarririyetniñ teklifine Ukraina ve Qırımnıñ 149 müellifi seslendi.

«Yarışqa Qırım müelliflerinden bayağı metn kelgen, «adımnı aytmañız, havfsızlığım içün qasevet çekem» kibi ricalar bar edi. Bizde ise arzumız bar – kitaplarnı elastı şeklinde Qırımğa kirsetmek ve olarnı anda taqdim etmek, amma bu kelecekke planlar», – dey Yelena Pavlova.

Kitapta mevzuatı boyunca bölüngen dört bölük bar: içtimaiy, siyasiy metnler, sevgi ve turmuş «seyaatlar, asret ve Qırım çiberekleri» aqqında eserler.

«Bu novellalardan ibaret olğan Qırım sanki çurçhela ya da yalıda satılğan pahlavadan kibi yapışaq izlerni qaldıra. Olarnı şimdi közyaşlardan farq etmegen deñiz suvunıñ tuzu boza», – dep aytıla cıyıntıqnıñ annotatsiyasında.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ Qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG