Link açıqlığı

Ukraina İçki işler naziri Arsen Avakov Qırımda qırımtatarlarnıñ aqları ile bağlı vaziyetni «genotsid ve yarımadadan quvğunlıq» olaraq adladı. Bunı o yaqında Hersonda jurnalistlerge bildirdi.

«Qırımda tatarlarnıñ aqları ile olğan vaziyet qanunsızlıqtır. Yani, genotsidniñ ekinci dalğası, qırımtatarlarnı ket-kete Qırımdan quvalar. Ukraina bunıñ ile razı olamaz. Buña er kes dayansa da, meseleniñ kerginligi deñişmey», – bildire Avakovnıñ sözlerini UNİAN.

Nazirniñ sözlerine köre, Qırım sakinlerine, qırımtatarlarğa qanunsız munasebet qayd etile ve bir kün olarğa uquqiy qıymet kesilecek.

«Yaqında Qırım içki işler idaresini ğayrıdan teşkil ettik, prokuratura ile birlikte Qırımda yaşağan Ukraina vatandaşları, qırımtatarlarnıñ aqları bozuluvını qayd etecekmiz. Ertemi, keçmi, keç olmasından erte dep belleyim, Qırım Ukrainağa qaytır ve er kes qazanğanını alır. İnsanlarğa aqları qaytarılmalı», – dedi nazir.

2014 senesi mart ayından Qırım Rusiye tarafından işğal etilgeninden soñ yarımadada cinaiy taqipler başlandı, Meclis ve uquq qoruyıcı teşkilâtlar qırımtatar halqına etilgen basqı aqqında defalarca bildirgen edi. Qırımlılar yarımadadan qıtaiy Ukrainağa köçmege mecbur.

XS
SM
MD
LG