Qırım Nazirler şurasınıñ reisi muavini Mihail Şeremet aytqanı kibi, Aqmescit ve Aqmescit rayonınıñ birleşüvi aqqında qararnı Qırımnıñ şimdiki başı Sergey Aksenov alacaq.
Bunı o sentâbr 15 künü işbu deñev leyhasınıñ amelge keçirilüvi boyunca iş gruppasınıñ birinci toplaşuvında bildirdi.
Şeremetniñ sözlerine köre, şeer ve rayonnıñ birleşüvinden ola bilecek aqibetlerden sebep, iş gruppası «bütün meselelerni diqqatnen teşkere».
«İş gruppası tarafından muayyen, açıq ve añlayışlı «yol haritası» azırlanmalı – müddetler, mesüliуetli şahıslarnı, maliye ceeti aqqında malümat. Bu meselede acele qararlarnı almağma mümkün degil», – dedi Mihail Şeremet.
O şunı da qoştı ki, şu işlerniñ neticesi Sergey Aksenovğa 2015 senesi dekabr 20-ne qadar berilecek, bundan soñ endi qarar alınacaq.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ Qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
