Link açıqlığı

Aqımdaki seneniñ aprel 15-den itibaren apiste yatqan «fevral 26 işiniñ» iştirakçilerinden biri, dört küçük balanıñ babası Ali Asanov bu işniñ diger iştirakçisi – sekiz aydan berli apiste bulunğan Meclis reisiniñ muavini Ahtem Çiygozğa muracaat etti.

Qırım.Aqiqatta mektüpniñ kopiyası bar, Asanov qayd ete ki, o, onıñnen beraber apiste bulunğanlar ve olarnıñ ailesi Çiygoz içün dua eteler.

«Allah mından çıqmağa yardım etsin, apiste qanunsız oturğanlarğa yardım etsin, ve bütün halqımızğa sabır bersin», – dep aytıla mektüpte.

Asanov bildirdi ki, onı «FSB büyük apis cezası ile qorquza», susmağa devam etse, (oña) «20 yıl berip, 6 biñ kilometr uzaqlıqqa alıp ketecekler».

«Bilem, Allah istemese, olar maña ve epimizge bir şey yapamazlar. Bizim içün, musulmanlar içün, halqımız içün canımnı feda etmege azırım, bir kimseni tiymesinler», – dep ayttı Asanov.

Qayd etmeli ki, mektüpniñ bir qısmı qırımtatarca yazılğan. Asanovnıñ Çiygozğa muracaatı:

«Selâm aleyküm, Ahtem ağa!

Nasılsıñız, sağlığıñız, balalarıñız ve qorantañız nasıl?

Men, mında yatqanlar, bizim qorantalarımız siziñ içün dua etemiz. Allah mından çıqmağa yardım etsin, apiste qanunsız oturğanlarğa yardım etsin, ve bütün halqımızğa sabır bersin! Amin!

Bizler de, siziñ kibi, mında yatıp sebebini añlamayıq, amma eminim, bunıñ da bir hayırı bar. Bu akimiyet kelgen ve bizge qarşı repressiyalar başlağan soñ halqımız birlik olmaq kerek, dep añladıq. Sabırlı oluñız. Allahqa dua etiñiz. Qartana-qartbabalarımız bu akimiyetniñ yapqanlarını körip, sabırlı olıp Vatanına qayttılar! Böyle olacağını kimse bilmegen edi, şimdi dayanmaq kerek. Allah bizge yardımcı olsun! Amin!

Ümüt etem ki, halqımız bizni – mında musulman, qırımtatarı olğanından yattqanlarnı – qaldırmaz. Aksine, bütün qanun imkânlarını qullanıp, bizim siziñnen azat etilmemizni talap eter. İnşAllah! Fikir ve islerniñ bir olması Birlik temelidir. Qayda birlik, anda tirlik.

FSB meni büyük apis cezası ile qorquza, susacaq olsañ, 20 yıl berip, 6 biñ kilometr uzaqlıqqa alıp ketermiz, dep aytalar. Amma bilem, Allah istemese, olar maña ve epimizge bir şey yapamazlar.

Bizim içün, musulmanlar, qırımtatarlar içün ölmege azırım, bizni bir daa tiymesinler. Allahqa yalvaram, bizim imanımıznı qaviyleştirsin. Allah dualarımıznı qabul eylesin. Amin!»

Ali Asanov, Qırım siyasiy mabusı

Hatırlatamız, taqiqatqa köre, Ali Asanov 2014 senesi fevral 26-da Qırım parlamentiniñ binası yanında Ukraina topraq bütünliginiñ tarafdarları ve «Rus birligi» firqası faalleriniñ iştiraki ile çoq biñli mitingde yüz bergen kütleviy çatışmalarnıñ iştirakçisi edi.

Delillerge baqmadan, ne birinci instantsiya mahkemesi, ne de Qırımnıñ Yuqarı mahkemesi adliyeciniñ Asanovnı azat etmek muracaatını qabul etti. Ali Asanovnıñ apis cezası aqımdaki seneniñ oktâbr 15-de bite. İyün ayında Asanovlar qorantasında dörtünci bala doğdı.

Ahtem Çiygoz aqımdaki seneniñ yanvar 29-da 2014 senesi fevral 26-da «kütleviy çatışmalarnı teşkil etüv ve iştirak etüv boyunca» cinaiy işniñ taqiqatı çerçivesinde yaqalanğan edi. Meclis reisi muavininiñ bir qaç kere uzatılğan apis cezası noyabr 19-da bite.

Avgust 24-te Qırımnıñ Yuqarı mahkemesi Qırımtatar Milliy Meclisi reisi muavininiñ imayesi bergen şikâyet arizasını red etti. Mahkeme Aqmescitniñ Kiyev rayonı mahkemesi çıqarğan qararını deñiştirmedi. Çiygoz mahkeme toplaşuvında Asanovğa basqı yapıp, oña qarşı malümat bermege zorlağanlarnı bildirdi.

XS
SM
MD
LG