Link açıqlığı

Ukrainada yañı tayinlengen Frenkistan elçisi İzabel Dümon aytqanı kibi, «Qırım meselesi» frenk siyasetiniñ kün tertibinde qala.

Bunı Ukraina tış işler naziriniñ birinci muavini Natalya Galibarenkonıñ ve İzabel Dümonnıñ körüşüvinden soñ Ukraina Tış işler nazirligi bildire.

Körüşüv devamında subetdeşler Ukraina şarqındaki vaziyetni muzakere ettiler ve Rusiye Federatsiyası tarafından Minsk añlaşmalarınıñ eda etilmek kerekligini qayd ettiler.

«Bu sırada Natalya Galibarenko Ukraina topraq bütünligi ve mustaqilligi meselelerinde Frenkistannıñ rolüni qayd etti. Öz tarafından, İzabel Dümon Frenkistannıñ ileride de «normand formatında» esas rolni becermege azır olğanını bildirdi ve Qırım meselesi frenk siyasetiniñ kün tertibinde qalacağına işandırdı», – denile beyanatta.

Evel Ukrainada Poloniya elçisi Genrik Litvin aytqanı kibi, «normand» ve «minsk» formatları Qırım işğali meselesini al etmey, şunıñ içün bu kibi muzakerelerge Ukrainanıñ qomşu memleketlerini celp etmege kerek olğanını qayd etti.

Meclis yetekçileri Qırım meselesini bütün halqara körüşüvlerde kötermege kerek olğanını defalarca aytqan ediler.

XS
SM
MD
LG