Link açıqlığı

Rusiyeniñ Naberejnıye Çelnı şeerinde mahkeme Tatar cemаat merkeziniñ reisi Rafis Kaşapovnı üç yıllıq apis cezasına maküm etti. Onı separatizmge çağıruv, milliy mensüplik boyunca nefret ve duşmanlıqnıñ peyda ettirüvde qabaatlı tanıdılar.

Rusiyede «separatizmge çağıruv» aqta mahkemege yetken birinci iştir.

Tatar cemaat merkeziniñ 56 yaşında reisi bıltır dekabr 29 künü yaqalanıldı. Onı nefret ya da duşmanlıqnıñ peyda ettirüvi ve İnternet vastası ile separatizmge çağıruvında qabaatlaylar. Söz üç metn aqqında kete: «Qırım ve Ukraina işğalcilerden azat olur», «Tünevin – Gitler ve Dantsig, bugün – Putin ve Donetsk!», «Ukrainanı ve bütün türk dünyasını qurtarayıq» ve «Rusiye olğan yerde – ölüm ve közyaş» fotokollajı. Bu sebepten oña qarşı bir qaç maddelerge köre cinaiy iş açıldı.

Taqiqatçılarnıñ muracaatı ile keçirilgen teşkerüv neticelerine köre, Kaşapovnıñ metnlerinde «ruslar», «Rusiye akimiyeti», «yarımadanıñ işğalci akimiyeti», «prezident Vladimir Putin» kibi kategoriyalarğa nefret doğurıla. Bundan ğayrı, tatar faaliniñ maqaleleri, deyler taqiqatçılar, Qırımda Rusiye akimiyetiniñ areketlerine menfiy munasebetni ve yarımadanıñ Rusiyege qanunsız qoşuluvı aqta tasavurnı teşkil ete. Bunıñ ile, qabaatlayıcı tarafınıñ fikrine köre, Kaşapov Qırım Rusiye territoriyası olmağanını bildire ve yarımadanı Rusiye işğalinden qorumağa çağıra.

Faali ve tuvğanları taqipler onıñ tatar, musulmanlar, Ukraina ve qırımtatarlarnıñ qoruvına yapqan çıqışlar ile bağlı olğanından emindirler.

«Memorial» uquq qoruyıcı merkezi Kaşapovnı siyasiy mabüsler cedveline qoştı.

XS
SM
MD
LG